आँटि न पइबा

||1||

यक दाँइ बँटा त बँटा बटिगै

अब लाख करा मुलु बाँटि न पइबा

 

यहि देस के बाग से गेना गुलाब

जुही कचनार कँ छाँटि न पइबा

मुँह सीयब ' कोमल ' बोरिन सों

जौ चाहा गदेलौ कँ डाँटि न पइबा

यक लाख प एक है भारी इहाँ

पुरखौ के बोलावा त आँटि न पइबा ||

||2||

माई क दूध पिया न तुँही

भल जीयत बा हमरो महतारी

सोवत बा अपनी निनिया

अरु जागत बा हमरी रखवारी

नेति खराब किहा तनिकौ

चुकवै कँ परे तोहैं कीमति भारी

' कोमल ' हाथ न खोंड़ करा

हम आँटब ना तोहरी अँकवारी ||

||3||

आँख देखाइस जे हमकाँ

हम ओकर आँख निकारि लिहे

' कोमल ' बेझिस जे हमकाँ

ओकरे बल काँ हम झारि लिहे

स्वारथ के बस आरत ह्वै

हम मोल केहू से न रारि लिहे

बाँह बटोरिस जे हमसे

पखुरा जरियै से उखारि लिहे ||

||4 ||

लाज न बा लतखोरन के

वन्है आपनि देह उघारि न लागै

आपनि पीर पहाड़ लगै

दुसरे क पिराय दुखारि न लागै

पीठि क धूरि झरी न तबौ

वनके पखना म बयारि न लागै

' कोमल ' साँच कही तोहँसे

हिकना क कहूँ प बजारि न लागै ||

||5||

उतपात करा जिनि तूँ जिव कै

अँखुरी पँखुरी सँखुरी मिटि जाये

गहना गुरिया क सवाल न बा

घर कै जोगई मसुरी बिकि जाये

भरि हींक जिआ औ जियै द हमैं

न त जीवन कै गगरी फुटि जाये

फुदका जिनि औरन के बल पै

अबकी पटके पँसुरी टुटि जाये ||

||6||

प्रेम पिरीति से जौ मिलब्या

रखबै हियरा म परान की नाईं

जौ परतीति औ रीति सवाचा

त साँचहु फेरब पान की नाईं

नीक कँ नीक अही हम ' कोमल '

बोला बिसेड़ी न बान की नाईं

जौं टेंटुआन्या औ आँखि तरेर्या

त खेदि के मारब स्वान की नाईं ||

रचनाकार :- कोमल शास्त्री

############

🙏