मरकहा बैल हउदी पै झनका

1.   अवधी गजल   (   मरकहा बैल हउदी पै झनका  ) :-

जेकाँ देखा उहै बाय सनका

मोट केव ना सबै बा महिनका |

देखि के हर , सइल औ जुआठा

मरकहा बैल हउदी पै झनका |

आँखि ह्वइगै टिकोरा - टिकोरा

राति कँगना ओसारे में खनका |

राति भै दर्द सोवा मजे से

भोर होतै कपारे पै हनका |

भोर से साँझ ले राम धुन में

एक जोगी अकासे में ढनका |

फूल ' कोमल ' खिला जौ नजर मा

कौनो भौंरा करेजे में मनका |

2. अवधी गजल ( दीया जेकै गगन मा बरे ) :-

दीया जेकै गगन मा बरे

होये सबही वही के तरे |

नेतागीरी अकासे चढ़ी

नौकरी बा पहुँच के परे |

हमकाँ अन्हियार बाँटे मिला

और उजियार वनके बरे |

एक मन जाये कोठा कइउ

काव लइके तू जाब्या घरे |

झाड़ झाँखर क गिनि - गिनि लस्या

आम बोला कहाँ से फरे |

लेखनी जबसे ' कोमल ' लिहे

खून कै रोसनाई भरे |

रचनाकार :- कोमल शास्त्री

############

🙏