माया खेलै खेल

||1||

बसि ईसर औ जीव बिच , माया खेलै खेल

जे ते उबरै जाल से , परे भगति के मेल |

||2||

फिकिर फरौथी फेंकि कै , मन कर ताल बजाव

' कोमल ' जिउ परतेजि कै , राखु न मान मनाव |

||3||

खुलै कपट कै पट जहाँ , माया होय उधार

मुलु अन्हरै अरचैं उहै , जामे बिसय बिकार |

||4||

बड़े - बड़न काँ गारि गै , माया कै फरफन्द

का बरनी गिरहस्थ काँ , खोइया ह्वइगै सन्त |

||5||

मायापती महेस काँ , माया दई नचाय

देव निबल केव होत तौ , ' कोमल ' जात हेराय |

||6||

मुँह भै माटी लेय ऊ , जेकरे चस्का लाग

जे परिगै परपंच मा , चौन्हियान जेस नाग |

||7||

' कोमल ' दिढ़ ह्वइकै कहै , रहै चहै फरकन्त

अइस झँकोरा देय ई , उखरै पाँव तुरन्त |

||8||

केव ठगिनी फुँकनी कहै , केव मुँह लगी महेस

मुला प्रकृति के नाँव से , जानी जाय बिसेस |

||9||

पदुम पात माया कही , जल जानौ जगदीस

पति राखै जलजात कै , मुला नात छत्तीस |

||10||

तीन नरक के द्वार हैं , तीनहि रुज परिवार

तीन गुनन कै जुति बनी , तीन लोक बिस्तार |

||11||

राकस कुल मा एक भा , सबसे बड़ अपवाद

जन्मा पूत कयाधु के , नाँव परा पहलाद |

||12||

काल चक्र चरखी मनो , माया ताको डोर

जिउ पतंग सदृस उड़ै , साँसा पवन बटोर |

||13||

नाहिं साँच पै साँच यस , मिथ्या जगत लखात

' कोमल ' नटई फारि कै , ज्ञानी जन अललात |

||14||

सबै करत बा झूमि कै , माया कै उपयोग

देव दनुज औ मनुज सब , रहे यही काँ भोग |

||15||

माया पति कै कृत्य है , लीला येकै नाँव

सदा रही है औ रहे , लीला पति के बाँव |

रचनाकार :- कोमल शास्त्री

############

🙏