पूजा पूजा धान

||1||

पूजा पूजा धान कै, पूजै मन कै घाव

पूजा इहै किसान कै, इहै भक्ति औ भाव ||

||2||

खुरपी खुरपा बेलचा, फरुहा और कुदार

पौरुष औ बलिदान कै, यै हमार हथियार ||

||3||

केसे आपन दुख कही, और करी फरियाद

उप्पर - उप्पर सब लखै, केउ न लखै बुनियाद ||

||4||

जब जग सोवै राति मा, निधरक चादर तान

तब किसान पलिवार लै, सटकै सूखा धान ||

||5||

जेठ दुपहरी मा जरै, ठरै माघ कै राति

तब जुगाड़ गुर कै कहूँ, कै पावै यहि भाँति ||

||6||

यहर झमकि कै दइउ जब, बरसै अरर मचाय

वहर बज्र बनि धान तब, किरसक रहा निराय ||

||7||

वहर वायदा यहर बा, मँहगायी कै मार

नेता पूँजीपति दुऔ, हमकाँ दिहे उजार ||

||8||

केकर - केकर गुन कही, केकर गायी गीत

केकरी डारी लागि कै, रोई बल भै मीत ||

||9||

खरई बनई बान्हि मुँह, करी जवानी होम

वनकाँ घिउ चपरी मिली, हमकाँ मिला विलोम ||

||10||

' कोमल ' हमरे करम कै, फल चाखैं वै लोग

जेकाँ माटी कै महक, लगै नाक कै रोग ||

||11||

चउवा - चाँगर पालि कै , महज जिआई पेट

दाना काँ नादान कहि , सेठ लगावै रेट ||

||12||

पाला पाथर से गहन, मनइन कै झटकार

गजब किसानी पै परी, मनरेगा कै मार ||

||13||

मन रे! गा कुछ और अब, छोड़ भेंड़ कै तान

निकरब होये अति कठिन, आगे और धँसान ||

||14||

' कोमल ' डूँड़ा बइठि के, चूनी चोकर खाय

बाँड़ा पैरा खाइ के, गोड़ तोरावै जाय ||

||15||

खेती घाटा कै रही, मुला किहिस अब ओर

सँचरा जब से गाँव मा, मनरेगा कै जोर ||

||16||

बढ़ी मजूरी झोरि कै, मुलु तिराय ना काम

चोख होय जौ काम तौ, गाढ़ अँटाय न दाम ||

||17||

नटई तर ना जात बा, अब नेतन कै बात

झलका डारिन जौन वै, वइसै बाय भभात ||

||18||

पहिया चला विकास कै, देखै मा निक लाग

मुलु किसान की आँत मा, अबौ बरति बा आग ||

||19||

भाव बढ़ा हर चीज कै, कइके हाहाकार

लेकिन गोहूँ धान कै, लुढ़की रहै बजार ||

||20||

चीज खरीदी रोइ कै, बेंची तौ रिरिआय

जेब घूम फिरि कै इहाँ, हमरै काटी जाय ||

रचनाकार:- कोमल शास्त्री

############

🙏